sabrina
مدير منتدى
عدد المساهمات : 193
نقاط : 501
تاريخ التسجيل : 13/09/2009
العمر : 34
الموقع : alger
 | موضوع: حوار ممتع بين شيخ وعجوزته يشاهدان لقاء  الثلاثاء سبتمبر 29, 2009 7:04 am | |
| الذي جرى بين شيخ وعجوز.  شيخ اسمه : الحاج بن علية وعجوزه الحاجة قندوزة ....المكان في بيتهما ...لقاء زامبيا الساعة 13.00... الحاج بن علية: اتلة بحال نربحوا
اليوم ؟...الطفل انتاع سعدان
نشفالو ملي كان مولا 20 عام.. يدور البلوطة
زين ...وذاك العام ادانا للميكسيك
...واليوم شاع وشاعت ايكيبو ، وقالك
ديفونس حديد ...وميليو مسركل ...وعشاري هز
على لبل ..واتاك فتاك ...ولابري
عاد ما يهزش من كثرة الاحتياطيين
..الحاجة قندوزة :ايه يا الحاج البلوطة
ذرك عادو يتبعوا فيها في كل
دار ..كي الصقار كي لكبار ...حتى الكناين لهاو
بيها ...في القهاوي والاعراس
والحمامات ..حتى في عمرتي كاين حباباتي
قالولي عليها ...الحاج بن
علية:انا راه عدي وقت ما
تبعتش ليكيب انتاعنا ..من عام لالمان ...وقالولي راه
عندنا فريق
مليح..اليوم راهم في بلاد الوصفان ...راني خايف على الشبيبة ...وعندي
حس
نديرو حاجة .. الحاجة قندوزة
:كنايني بالعين مستفين يشوفوا في الماتش في الدار الكبيرة ...ذراريهم ثاني
...ورجالاتهم في الصالون ما نحكيلش ...الحاج بن
علية:ايما لا نشوف معاهم الماتش ...القهوة ..القهوة ...ولاتاي ...وغدونا بكري يرحم
والديك ...الحاجة قندوزة
:ايه ..ايه .. يا الحاج ..راه بنك الكبير ذابح اليوم ...وكل الخير كاين
...الحاج بن علية:نروح نشري حبيبات دلاع ...وتكتكينا فيها ضليعات
...ميهة باردة ...الحاجة قندوزة
:ما تروح ماوالو الماتش بدا ..وراهم تقول مركاو بيت ...الحاج بن
علية:صحيت يا ربح البيت ...ربي يحفظك يا عبد المجيد...فارس من ظهر فارس ...ربي
يحفظك لغلاسغو رانجرس ...الحاجة قندوزة
:اووورررووورررريح (تزغرد)الحاج بن
علية:هذا الاول ...وان شاء الله الزويجة ...ونخرج الزويجة ...طخ طخ طخ وتحيا
الدزاير ...يا عمر نوض
الكاميو ودير الباش وستف
فيه البزوز والصقار ولكبار ...وامرطو من فوق علامات
...انتاع الدزاير
...اليوم راه يوم الاستقلال ...والله فرحتنا كيما ذاك النهار
..والا اكثر
...اطلق روح ..طخ طخ طخ تحيا الدزاير
..وبربي ان شاء الله في المونديال ...طخ طخ طخ ...  | |
|
